Martxoaren 12an, atzo 28 urte betete ziren ikasleok, gazteok, euskalgintza eta kultur mugimenduko kideok, langileok, langileok... euska herritarrok OTANi ezezko borobila adierazi geniola. Gaur gaurkoz euskal herritarrok hartutako hitzak ukatua eta zapaldua izaten jarraitzen du ordea. Bardeak ditugu hain zuzen ere Euskal Herriaren subiranotasunaren lapurreta argia eta OTANen isla agerikoa. Horregatik goizean Gasteizko Legebiltzarraren aurrean elkarretaratzea burutu genuen (argazkia) eta arratsaldeko 20:00etan berriz Iruñako Gobernu Zibilaren aurrean batu, Euskal zein Espainiar instituzioei orain 28 urte Hego Euskal Herrian titular bilakatuko aldarria errespetatzeko eskatuz.

Orain 28 urte, euskal herritarrok Euskal Herriaren subiranotasun nazional eta sozialari baiezkoa eman genion eta papeletaz papeleta Euskal Herri antiinperialista aldarrikatu. Gure askatasun eta burujabetzaren alde egin genuen eta aldi berean, munduko herrien askatasun eta subirautasunen kontra doazen prozesu politiko, ekonomiko eta militarren aurka agertu zen herria izan zen gurea, izan ginen gu.

Horregatik datorren martxoaren 12an kalera aterako gara, berriz ere atzoko ideia eta egitasmoak gure egingo ditugu,herriok ez dugulakoa ahazten, ezin dugulako gure memoria kolektiboa alboratu. Orain 28 urte egin bezala OTANi ezetz esango diogu, inperialismoari bizkar emanez eta beste behin ere, guztiaren gainetik, Euskal Herriaren burujabetza aldarrikatuko dugu.

Honela, datorren asteazkenean elkarretaratzeak egingo ditugu goizean Gasteizko Legebiltzarraren eta arratsaldez Iruñako Gobernu Zibilaren aurrean, Euskal zein Espainiar instituzioei orain 28 urte Hego Euskal Herrian titular bilakatuko aldarria errespetatzeko eskatuz.

Martxoarekin batera ekin diogu ikasturte honetako brigada kanpainaren azken txanpari. Asko zarete aurtengo udaran gurekin batera herrion borrokak irutera animatu zareten kideak, baina oraindik bada lekua guztiontzat.

Zalantzak dituzula? Ez dakizula brigada batean zer egiten den? Askapen borrokan ari diren herrien berri jakin nahi duzula? Hurbildu bada euskal herri luzea eta zabalean antolatzen ari garen aurkezpen-hitzaldietara. Aurreko urteetako brigadisten esperientzia eta bizipenetatik, Sahara, Palestina, Bolivia, Argentina, Uruguay edo eta Venezuelako errealitatea hobeto ezagutu eta brigada baten egunerokoaz gehiago jakiteko aukera izango duzu.

Gogoratu izen emateko epea martxoaren 30ean itxiko dela eta brigadak@askapena.eus helbidera email bat idatzi besterik ez duzuela.

Animatu eta zatoz gurekin herrion borrokak irutera!

Orain 28 urte euskal herritarrok zita berezi baina esanguratsua izan genuen hautesontziekin. 1986ko Martxoaren 12 hartan, papeletaz papeleta, kalez kale, lantegi, instituzio, herriko plaza zein ikastetxeetan, mitin, manifestazio, kontzertu edo ekimen ezberdinetan aldarrikatutako ideia letra larriko lerro buru bilakatu genuen; “Ezezko borobila OTANi Hego Euskal Herrian”.

Espainiar Estatua 1982an sartu zen Aliantza Atlantikoan edo OTANen (Organización del Tratado del Atlántico Norte). Erabaki hark espainiar eta euskal eskuin indarraren onespena jaso bazuen ere, jakina zen euskal herritarren gehiengoa ez zetorrela bat erabaki harekin. Hala erakutsi genuen lau urte beranduago, Konstituzio Espainiarrarekin egin bezala. Ikasleak, gazteak, euskalgintza eta kultur mugimenduko kideak, langileak... euskal herritarrok azken batean, beste behin ere gure nortasun eta izatea aldarrikatu genuen, gure lekua eta gure munduaren ikuskera. Zapaldutako herri izaki, beste edozein herriren zapalketaren aurka geunden, guretzat herrien arteko harremanak elkartasunean eraiki behar direlako, sortzeke dugun itun baliotsua, bestalde.