Maiatzaren 1ean borrokak uztartzen, herriok burujabe!

Askapenaren 30. urteurrena den honetan ere gure irakurketa plazaratu nahi dugu maiatzaren lehenaren harira:

Sistema kapitalista inperialista heteropatriarkalak munduko herriak irentsi nahi ditu, nazio, klase eta genero zapalkuntzaren bitartez, ahalik eta denbora laburrenean ahalik eta etekin handiena ateratzeko. Herriok, langileok eta emakumeok jazartzea da kapitalaren mekanismoa. Horretarako, egitura ugari sortu ditu sistemak, hala nola Estatu burges zapaltzaileak, Europar Batasuna, NATO, Nazioarteko Diru Funtsa edota Munduko Bankua. Denak ala denak, burgesiaren interesak babesteko aparatu politiko, ideologiko, ekonomiko eta militarrak. Horietako bakoitzak irauten duen bitartean, herriok autoritarismoa, menpekotasuna, beldurra eta errepresioa besterik ez ditugu izango aurrean.

Horrela, Europan, gure borroka zelaian, aldaketa ugari ematen ari dira azken aldian. Brexit-a dela, faxismoaren gorakada, Greziak bizi duen egoera neokoloniala, Ukrainako gerra, errefuxiatuen afera... Hauek denek, Europar Batasunak bizi duen krisiaren berri emateaz gain, krisi hori gainditzeko duen ezintasuna argi adierazten dute. Egitura honen barruan, ezinezkoa izango da langileon burujabetza eskuratzea.

Beraz, argi daukagu ez dagoela sistema honen baitan alternatibarik, berau suntsitu egin behar dela. Ezinbestekoa da erasoei erresistentziaz erantzutea. Ezinbestekoa da sistemaren kaiolatik haratago herri boterea eraikitzea. Ezinbestekoa, herri langilea antolatu eta beste mundu bat eraikitzeko borrokara batzea. Gaurdanik loratzen ari den jendarte berria izango baita zapalkuntza horri alternatiba jartzeko gai izango den subjektu bakarra.

Zentzu horretan Askapenatik dei egin nahi diegu euskal internazionalistei maiatzaren 1 honetan antolatu diren mobilizazioekin bat egiteko. Aipamen berezia egin nahi diogu Bilbon arratsaldeko 18:00tatik aurrera herri mugimenduko hainbat eragilek elkarlanean Maiatzak 1 egin ekimenak antolatu duen mobilizazioari.

Gora langileon borroka!

Gora Euskal Herria Sozialista!

Borrokak uztartzen, Herriok burujabe!