Historia egin zuten atzo Herrialde Katalanetan, estatu espainolaren errepresio bortitzaren aurrean. Atzotik aurrera ezer ez da berdina izango. Atzokoa desobedientzia zibilaren praktikaren adibide argia izan zen; instituzio eta herri mailan garatutako herri-desobedientzia masiboa.

Azken hilabetean, asko entzun dugu erreferendumaz, demokraziaz; asko, boto eskubideaz. Asko entzun dugu Generalitataz, akordio nazionalez, Parlamentaz. Tresna erabakigarriak izan dira Kataluniako autodeterminazio eskubidea egikaritzeko prozesu honetan. Baina, askotan, esaten denak baino, esaten ez denak ematen dizkigu egoera ulertu eta posizioa hartzeko behar ditugun elementuak.

Greziatik ere #U7Berriozar-era joateko deia egin dute!
Ta zu, bazatoz?
Eskuratu bazkariko txartelak hemen: https://t.co/D6LvYhW6vn pic.twitter.com/q6hF3uN6c4

— Askapena (@Askapena) 2017(e)ko urriak 2

Hurrengo egunetan, asko izango dira Euskal Herritik Herrialde Katalanetara hurbilduko diren herritarrak. Era berean, asko izango dira Euskal Herrian Kataluniako erreferendumaren alde egingo diren ekimen ezberdinak. Hau ikusirik Askapenatik ekarpen internazionalista hau egin nahiko genuke:

Internazionalismoa, elkartasunean oinarritzen den praktika politiko bat da. Gure herriaren askapen prozesuaren garapenak gainontzeko herrien askapenaren garapenean laguntzen duela eta alderantziz ulertzea hain zuzen. Beraz, elkartasun hau, ez da soilik beste herriengatik egiten, norberaren herriarengatik ere egiten da.