Concepiongo El Manzano gartzelako, Temuko eta Angol-eko 23 preso maputxe komunero gose greba mugagabean hasi dira. Pasa den igandean ekin zioten protestari eta jadanik, gendarmeriak informatu bezala, lehen ondorioak jasaten hasi dira, zenbaitek 4 kilotik gora galdu dute jadanik, hala ere, borrokarekin jarraitu eta indartsu daudela jakinarazi dute senitartekoek. Hauexek dira azken muturreraino eramateko prest diren grebalarien eskakizunak:

1.-Maputxeen aurkako lege antiterrorista deuseztatzea, oraindik indarrean dirauen Pinochet diktadorearen legea, hain zuzen.

2.-Maputxeak epaitzen dituzten Tribunal militarren amaiera.

3.-Txileko estatuan zehar preso dauden Maputxe preso politikoentzat askatasuna: Epaiketa justu bat izateko eskubidea eta muntaia polizialen amaiera, ezkutuko lekukoen parte hartzea debekatu, tortura eta mehatxuekin amaitu eta giza eskubideak defendatuz.

Askapenak bat egiten du maputxeek, Gulumapukoek kasu honetan, hasitako protesta eta aldarrikapenekin, adi egon beraz asteotan Euskal Herrian egingo diren deialdiekin.

'Biladi hadi' brigada kulturala Palestinan dago, bertatik partehartzaileek publikatutako hainbat bizipen iritsi dira jada. Jarraian Fredi Paiak oparitutakoa:

Larrepetit. Fredi Paia (berria.info)

Mohameten begiak

Amanen hormaginek gauez egiten dute lan. Goizeko hiruretan ere lanaldi betean dago Mataam Hashimen jatetxe txikia. Ingelesa, inperio nagusiko hizkuntza ere zubi ez den leku eta orduetan, irribarreak betetzen ditu egun beteko bidaiarien sabelak. Hori bai, falafel, oliodun ahuntz gazta eta globalizazioak San Frantzisko auzoan aurkeztu zizkigun garaitiko baba eta garbantzu xehetuen laguntzarekin.

Marokon konturatu nintzen Mohamet izena dutela musulman guztiek hartu eman ekonomiko hutserako. Hala zuen izena gure taxistak. Espainiar selekzioaren futbol garaipena presente dago Jordaniako kaleetan, Jerusalemeko ume arabiarren gorputzetan bezala. Damaskoko ate ondoko dendariak argi esan digu kataluniarrek euren selekzioa izango dutela hurrengo mundu kopan. Basque? Harridura aurpegiak eta azalpen luzeak.

Jerusalemgo hiri zaharra barrutik eta kanpotik ezagutu ostean, okupazioaren kontra manifestatu ondoren, Ramalako alkatearekin bildu eta gero, festarako garaia iritsi zaio musika tresnaz ondo horniturik etorri den brigadari.

Atzo Ramalan eta gaur Birzeiten eskusoinua, trikitixa, txirula, tanborra eta bibolina atera eta dantzan jarri ditugu palestinarrak. Haurrak berehala animatu dira, ia Birzeiteko apaiza ere dantzan hasi da,baina gaurkoan benetan ezinezkoa zena lortu dugu, brigadako hainbaten porlanezko gerriak mugiarazi eta dantzan jarri ditugu Porrotx buru zutela.

Oraingoz ezkerreko jendearekin elkartu gara, eta diferentziak diferentzia, ezin ditugu burutik kendu Palestinak Euskal Herriarekin dituen antzekotasunak.

'biladi hadi' brigadaren blog-a: http://biladihadi.wordpress.com

Bere osotasuenan iritsi da 'biladi hadi' izeneko brigada kulturala Palestinara (“biladi”-k nire herria/nire lurra esan nahi du). Uztailaren 15ean elkartu ziren partehartzaile guztiak, aireportu edo mugako kontroletan aparteko arazorik izan gabe Zisjordanian. Brigada berezi hau iazko 'elkartasunez tour' -aren jarraipena da. Orduan artista palestinarrak (bertsolariak, abeslariak...) izan ziren Euskal Herrian emanaldi eta harreman ezberdinak egiten. Oraingo honetan gu gara Palestinara abiatu garenak, arlo ezberdinetan lan egiten dugun euskaldunak, bertsolariak, irakasleak, ikasleak, kazetariak, musikariak eta antzerkilariak izango gara Palestinako lurretan egun batzutan.

Egitasmoa argia da, arloz arlo eta elkartasunez bertan emanaldiak edota elkarlanean ibili bertako kultura arloko lagun zein herri mugimenduekin. Modu honetan bi herrion arteko harremanean sakondu eta Palestinar herriari gure elkartasun osoa adieraziz. Israelgo estatu sionistari boikota egiteaz gain, Palestinarekin harremanak sustatzea bait delako elkartasun modurik eraginkorrena.

Brigada kultural honen nondik norako guztiak blog honetan topatuko dituzue: http://biladihadi.wordpress.com/

Gora Palestina askatuta!