Urriaren 22an, autoritate sionistak beste behin saiatu dira erakunde palestinarren jarduera eteten eta borroka isilarazten, kriminalizazioaren bitartez. Egun horretan bertan, “terrorista” izendatu zituzten hainbat sektoretan herri palestinarraren eskubideen alde borrokan dabiltzan sei erakunde: Al-Haq, Addameer, Defence for Children International Palestine, Bisan Center for Research and Development, The Union of Palestinian Women’s Committees eta Union of Agricultural Work Committees, hain zuzen ere.
Zalantzarik gabe, beste errepresio eta kriminalizazio urrats bat gehiago da, Palestinaren askapenerako borrokan ari den erakunde eta mugimendu ororen aurka. Izendapen horren asmoa, zehazki, erakunde palestinarrak isilaraztea eta kolpatzea da, baita elkartasun internazionalista moztea ere. Oraingo honetan, emakumeen eskubideen eta gazteen nahiz presoen eskubideen alde lanean ari direnei zuzendu diete, bereziki, erasoa.
Estatu kolonial honetako autoritateen erasoek ez dute etenik. Herri palestinarraren autoantolatze eta erresistentzia adierazpen ororen aurka errepresioa darabilte eta, aldi berean, abiadura handian garatzen jarraitzen dute kolonizazioan, okupazioan, apartheidean, herria kanporatzean eta garbiketa etnikoan oinarritzen den proiektua. Hori guztia, nola ez, proiektu kolonial israeldarra sustatzen duten potentzia inperialisten babesaz eta inpunitate lotsagarri osoz.
Azken eraso honen aurrean, Askapena erakunde internazionalistak gure babesa adierazi nahi dio erasoa jasan duten erakundeei eta, bide beretik, gure elkartasun osoa helarazi herri palestinarrari, askapenerako borrokan. Konpromiso osoa hartzen dugu kolonizazio sionistaren krimenekiko konplize den oro salatzeko Euskal Herritik.
Sarritan esaten da inperialismoaren eta kapitalismoaren aurka borroka egiten dugun guztion auzia dela auzi palestinarra. Bide horretan, beraz, ondoan gaude.
Hamaika herri, borroka bakarra!
Gora Palestina askatuta!
Duela urtebete inguru, Chadli Aloui, ikasle eta artista gazte siziliarrari kontrol bereziko neurriak ezarri zizkion Palermoko justizia auzitegiak. Chadli, Palermo erdiguneko auzo pobretuetako nerabe eta gazteekin egindako heziketa lanagatik ezaguna da eta herri gimnasioan entrenatzaile eta antzerki sozialetako aktorea izanik, ez ditu bere balore antiarrazista eta antifaxistak ezkutatu lan militantea egiterako garaian. Pertsona migranteen eskubideen alde, erraustegien aurkako borroketan, espetxeratutako gazteen alde eta Siziliaren defentsan ere aritu izan da Chadli.
Asko dira, hainbat urtez, Kubaren aurka egindako blokeo saiakerak. Azken urteotan, hain zuzen ere, askotarikoak izan dira Kubako herriak jasan behar izan dituen erasoak, pandemia betean ezarritako zigorrak, kasu. Uda honetan, komunikabide hegemonikoak gobernuaren aurkako mobilizazioak erakusten saiatu dira, Miami eta Estatu Batuen diruz hornitutako kubatar sektore baten eskutik. Ondo dakigu, ordea, komunikabideetan saltzen duten egoera ez datorrela bat Kubako benetako errealitatearekin; hau da, komunikabide hegemonikoek potentzia inperialisten interesei erantzuten dietela. Dena den, Cubainformación gisako komunikabideei esker, Kubako errealitatea hobeto ezagutzeko aukera daukagu; saltzen zaigunetik aldentzeko aukera ematen digute. Baina, noski, horrek kontrairaultzaileei molestatu egiten die.
